Բացահայտիր Շիրակը-Երկրորդ աշխարհամարտում զոհվածների հուշարձանը Ցողամարգում
Շիրակի մարզի Ցողամարգ գյուղում է գտնվում Երկրորդ աշխարհամարտում (1941-1945 թթ.) զոհված համագյուղացիների հիշատակին նվիրված հուշարձան-աղբյուրը: Հուշահամալիրը կառուցվել է 1982 թվականին՝ տեղական սև և կարմրավուն տուֆ քարերից:
Հուշարձանն ունի աղբյուր-հուշակոթողի ճարտարապետական հորինվածք: Ճակատային մասում վեր է խոյանում նախշազարդ կամարը, որի կենտրոնական հատվածում քանդակված է հավերժության նշան (արևախաչ): Կոթողի վերնամասում՝ կարմիր տուֆի վրա, փորագրված են «1941-1945» թվականները:
Հուշարձանին կից տարածքում տեղադրված է կարմիր տուֆից քանդակված արծվի գլուխ, որը խորհրդանշում է ուժ, արիություն և հայրենիքի հավերժ պահապան ռազմիկների հիշատակը:
Այս հուշարձանը ներառված է Շիրակի մարզի պատմության և մշակույթի անշարժ հուշարձանների պետական ցուցակում և հանդիսանում է համայնքի պատմական հիշողության ու հարգանքի տուրքի կարևոր կենտրոն:
Տեղակայումը. Հայաստանի Հանրապետություն, Շիրակի մարզ, Ցողամարգ գյուղ, բնակավայրի տարածքում:
Կոորդինատները. 41°00'01.8"N 43°52'16.2"E
Լուսանկարը `Հուշարձանների պահպանության Շիրակի մարզային ծառայության