Բացահայտիր Շիրակը- Մարալիկի Սուրբ Աստվածածին եկեղեցի («Կարմիր վանք»)
Շիրակի մարզի Մարալիկ քաղաքի արևմտյան եզրին է գտնվում պատմամշակութային ու ճարտարապետական ուշագրավ կառույցներից մեկը՝ Սուրբ Աստվածածին եկեղեցին, որը հաճախ հիշատակվում է նաև «Կարմիր վանք» անվամբ։
Սրբավայրի տարածքն ունի դարավոր հարուստ պատմություն։ Մոտ երկու հարյուր տարի առաջ այստեղ գործել է Սուրբ Ստեփանոս մատուռը։ Բացի այդ, ըստ պատմական տվյալների, ներկայիս կառույցը հիմնադրվել է 5-րդ դարի հինավուրց եկեղեցու հիմքերի վրա։ Արևելյան դռան վերևում պահպանված արձանագրության համաձայն՝ եկեղեցին վերակառուցվել է 1898-1903 թվականներին։
Խորհրդային տարիներին, ինչպես բազմաթիվ այլ հոգևոր կառույցներ, Մարալիկի Սուրբ Աստվածածին եկեղեցին նույնպես դադարեցրել է իր բուն գործունեությունը և ծառայել որպես պահեստ։ Ավելի քան մեկ դար կիսավեր ու անխնամ վիճակում գտնվելուց հետո, եկեղեցին առաջին անգամ ամբողջապես վերանորոգվել և վերաբացվել է 1994 թվականին։
Հետագայում՝ ռուսաստանաբնակ մարալիկցիների բարերարությամբ, իրականացվել են լայնամասշտաբ վերականգնողական աշխատանքներ։ 2019 թվականի նոյեմբերին Շիրակի թեմի առաջնորդ Միքայել եպիսկոպոս Աջապահյանի ձեռամբ եկեղեցին վերաօծվել է՝ կրկին իր դռները բացելով հավատավոր ժողովրդի առջև։
Տեղակայումը՝ ՀՀ, Շիրակի մարզ, ք. Մարալիկ
Կոորդինատները՝ 40°34'22.8"N 43°51'52.5"E