Գյումրու քաղաքապետարանի ներկայացուցիչները հարգանքի տուրք են մատուցել Արցախյան պատերազմներում նահատակվածների հիշատակին. Գյումրու քաղաքապետարան

Գյումրու քաղաքապետարանի ներկայացուցիչները հարգանքի տուրք են մատուցել Արցախյան պատերազմների զոհերի հիշատակին

Սեպտեմբերի 27-ին լրանում է Ադրբեջանի կողմից Արցախի դեմ սանձազերծված 44-օրյա լայնամասշտաբ պատերազմի 6-րդ տարելիցը։ 2020 թվականի այս օրը սկսված ռազմական գործողությունները ծանր հետևանքներ թողեցին հայ ժողովրդի պատմության մեջ․ պատերազմի հետևանքով հայկական կողմն ունեցավ ավելի քան 3800 զոհ, հարյուրավոր վիրավորներ ու անհետ կորածներ։ Արցախյան բոլոր պատերազմներում իրենց կյանքն են զոհաբերել նաև Շիրակի մարզի ու Գյումրու հարյուրավոր արժանավոր հայորդիներ։ Ըստ պաշտոնական տվյալների, 44-օրյա պատերազմում Շիրակի մարզից հավերժության ճամփան բռնեց շուրջ 150 զինծառայող ու աշխարհազորային։

Տարելիցի կապակցությամբ այսօր Գյումրու քաղաքապետին փոխարինող Ավետիս Առաքելյանի և քաղաքապետարանի աշխատակազմի քարտուղար Կարեն Մալխասյանի գլխավորությամբ Գյումրու քաղաքապետարանի աշխատակազմը, ավագանու «Հայաստանի Կոմունիստական կուսակցություն» խմբակցության անդամները, ինչպես նաև քաղաքապետարանի այլ ներկայացուցիչներ այցելեցին Գյումրու «Շիրակ» գերեզմանատուն՝ հարգանքի տուրք մատուցելու ինչպես 44-օրյա, այնպես էլ Արցախյան բոլոր պատերազմներում նահատակված հերոսների հիշատակին։

Ավետիս Առաքելյանը խոնարհվեց զոհերի հիշատակին կանգնեցված հուշարձանի մոտ և ծաղիկներ տեղադրեց։ Հարգանքի ծաղկեպսակ էր դրվել նաև Գյումրու քաղաքապետ Վարդան Ղուկասյանի անունից։

Այնուհետև Ավետիս Առաքելյանն ու Կարեն Մալխասյանը մեկ առ մեկ մոտեցան ոչ միայն 44-օրյա, այլև Ապրիլյան քառօրյա պատերազմի զոհերի հարազատներին, խոնարհվեցին հերոսների շիրիմների առջև, խնկարկեցին ու հարգեցին նրանց սխրանքը։

Քաղաքապետարանի պաշտոնյաները այցելեցին նաև նույն գերեզմանատանը՝ պանթեոնից ոչ հեռու գտնվող հիշատակի խաչքարի մոտ, որտեղ ևս լուռ խնկարկումով հարգեցին զոհերի հիշատակը։ Այս խաչքարը կանգնեցվել է 2000-ականների սկզբին՝ քաղաքապետ Վարդան Ղուկասյանի նախորդ պաշտոնավարման տարիներին, և նվիրված է Արցախյան առաջին պատերազմում նահատակված քաջորդիների հավերժ հիշատակին։