Բացահայտիր Շիրակը- «Ծակ քար» հնագույն ամրոցն ու սրբատեղին
Հայաստանի հարուստ պատմամշակութային ժառանգության մեջ առանձնահատուկ տեղ են զբաղեցնում հնագույն ամրոցներն ու սրբատեղիները, որոնցից է Շիրակի մարզի Մարալիկ քաղաքից մոտ 5 կիլոմետր դեպի արևմուտք գտնվող «Ծակ քար» ամրոցը։
Այս ուշագրավ հուշարձանախումբը թվագրվում է Ք.ա. 2-1-ին հազարամյակներին՝ ընդգրկելով ուշ բրոնզի և երկաթի դարաշրջանները։
Այն պետության կողմից պահպանվող հանրապետական նշանակության հուշարձան է և ներառված է Մարալիկի պետական պահպանության տակ գտնվող պատմության և մշակույթի անշարժ հուշարձանների ցանկում։
Ամրոցի անմիջական հարևանությամբ և դրան հարող տարածքում առկա են նաև այլ պատմական շերտեր. մասնավորապես՝ մ.թ.ա. 1-ին հազարամյակին բնորոշ հնագույն բնակատեղի, ինչպես նաև միջնադարյան քարայր-սրբատեղի, որը տեղացիների շրջանում նույնպես հայտնի է «Ծակ քար» անունով։
Այս հուշարձանների համալիրը կարևորագույն աղբյուր է տարածաշրջանի հնագույն բնակչության կենցաղի, պաշտպանական համակարգերի և հոգևոր ընկալումների ուսումնասիրության համար։
Հուշարձանը գտնվում է Շիրակի սարահարթի արևմտյան հատվածում՝ բլրային բարձրադիր գոտում, իսկ դրա աշխարհագրական կոորդինատներն են՝ 40°34'31" և 43°47'12։
Լուսանկարները `Հուշարձանների պահպանության Շիրակի մարզային ծառայության