«Արտաքին պարտքի ընդամենը 1%-ն ուղղելով Գյումրի՝ բնակարանաշինության հարցը վերջնականապես կլուծվեր». Ավետիս Առաքելյան

Գյումրու քաղաքապետարանից տեղեկացնում են.

Վարդան Ղուկասյանի գլխավորած քաղաքական թիմի կառավարման մեկ տարին ամփոփող ելույթում Գյումրու քաղաքապետին փոխարինող Ավետիս Առաքելյանն անդրադարձավ քաղաքի ամենացավոտ խնդրին՝ բնակարանաշինությանը և բնակֆոնդի արդիականացմանը:

​Ըստ նրա` շուրջ 13 տարի քաղաքում բնակարանաշինական որևէ լուրջ ծրագիր չի իրականացվել, ինչի հետևանքով Գյումրին այսօր կանգնած է բնակֆոնդի լուրջ ճգնաժամի առաջ:

​Ներկայացնելով բնակարանաշինական ծրագրերը՝ Առաքելյանը ուշագրավ համեմատական անցկացրեց երկրի արտաքին պարտքի և Գյումրու կարիքների միջև.

​«Վերջին 8 տարում Հայաստանի արտաքին պարտքն ավելացել է 8 միլիարդ դոլարով: Այդ գումարի ընդամենը 1 տոկոսը կազմում է 80 միլիոն դոլար: Եթե այդ պարտքի ընդամենը մեկ տոկոսն ուղղվեր Գյումրու բնակարանաշինությանը, ապա քաղաքի բնակարանային խնդիրն այսօր ամբողջությամբ լուծված կլիներ»,- նշեց Ավետիս Առաքելյանը:

​ Նրա խոսքով՝ քաղաքը չի կարող զարգանալ, քանի դեռ լուծված չէ բնակչությանը արժանապատիվ կացարանով ապահովելու հարցը:

​