Բացահայտիր Շիրակը -Ղարիբջանյան գյուղ
Ղարիբջանյան գյուղը գտնվում է Շիրակի մարզում՝ մարզկենտրոն Գյումրիից ընդամենը 6 կմ հարավ-արևմուտք: Այն տեղակայված է Ախուրյան գետի ձախ ափից ոչ հեռու, մեղմաթեք հարթավայրում՝ ծովի մակարդակից 1470 մ բարձրության վրա:
Համայնքի տարածքով են անցնում Գյումրի-Արմավիր ավտոխճուղին և Գյումրի-Կարս երկաթուղին: Բնակավայրն ընդգրկում է Ղարիբջանյան և Ախուրյանի կայարան (Ախուրյան կայարան) բնակավայրերը:
Բնակավայրն ունի հարուստ պատմական անցյալ: Նախկինում այն կրել է Ալեքսանդրովկա, Ղարաքիլիսա Թազա, Ղարաքիլիսա Նոր, Ղարաքիլիսա Ռուսի անվանումները: Երևանի նահանգի Ալեքսանդրապոլի գավառի կազմում ընդգրկված բնակավայրը Ղարիբջանյան է վերանվանվել 1935 թվականի հունվարի 3-ին՝ բոլշևիկ Բագրատ Ղարիբջանյանի պատվին:
Ղարիբջանյանի բնակչության նախնիների մի մասը 1828-1830 թվականներին գաղթել է Արևմտյան Հայաստանի Ալաշկերտի և Էրզրումի (Կարին) գավառներից, ինչպես նաև Կարսի մարզից:
Գյուղում կլիման բարեխառն լեռնային է: Ձմեռը տևական է, ցուրտ, հաստատուն ձնածածկույթով: Հաճախակի են ուժեղ քամիները, ձնաբքերը և սառնամանիքները: Ամառը զով է, համեմատաբար խոնավ:
Գյուղատնտեսության հիմնական ուղղությունը երկրագործությունն ու անասնապահությունն են:
Բնակիչները մշակում են հացահատիկային և կերային կուլտուրաներ, բանջարաբոստանային բույսեր: Նախկինում այստեղ ակտիվորեն զբաղվում էին շաքարի ճակնդեղի մշակությամբ, որը վերամշակվում էր Սպիտակի շաքարի գործարանում, սակայն 1988 թ. ավերիչ երկրաշարժից հետո գործարանի փլուզման պատճառով ցանքատարածությունները կտրուկ կրճատվեցին:
Անասնապահության ոլորտում զբաղվում են խոշոր և մանր եղջերավոր անասնաբուծությամբ, թռչնաբուծությամբ և մեղվաբուծությամբ:
Ղարիբջանյանցիներին բնորոշ է Շիրակի դաշտավայրի բնակիչների աշխատասիրությունը, տոկունությունն ու պինդ կամքը, որը ձևավորվել է դարերի ընթացքում՝ դիմակայելով տարածաշրջանի խիստ ու ցուրտ ձմեռներին: Լինելով Ալաշկերտից, Էրզրումից և Կարսից գաղթածների սերունդներ՝ գյուղացիները աչքի են ընկնում հյուրընկալությամբ, ավանդապահությամբ, հողի նկատմամբ հատուկ նվիրվածությամբ և շիրակցուն հատուկ ինքնատիպ հումորով ու ուղղամտությամբ:
Շիրակի մարզ, Գյումրիից 6 կմ հարավ-արևմուտք, Ախուրյան գետի ձախ ափին, ծովի մակարդակից 1470 մ բարձրության վրա։
Կոորդինատներ 40°44'46"N 43°47'49"E