Բացահայտիր Շիրակը-Թուխ Մանուկ մատուռ-սրբատեղին
Շիրակի մարզի Բենիամին գյուղի պատմամշակութային ժառանգության կարևորագույն մասն են կազմում տարբեր դարաշրջանների հնագիտական ու հոգևոր հուշարձանները։ 1990-ական թվականներին Բենիամին գյուղից 2 կմ դեպի հարավ-արևելք՝ «Գիլանու ձոր» կոչվող վայրում, հայտնաբերվել է վաղ միջնադարյան գյուղատեղի, որից պահպանվել են միայն աննշան հետքեր։
Բենիամինից արևելք՝ բլրի լանջին, տարածվում է Թուխ Մանուկ գյուղատեղին, որտեղ մարդիկ բնակվել են V-XVII դարերում։
Գյուղատեղիի արևմտյան մասում է գտնվում վաղ միջնադարյան գերեզմանոցը, իսկ բլրի գագաթին վեր է հառնում Թուխ Մանուկ մատուռ-սրբատեղին։
Ի սկզբանե այս սրբատեղին եղել է ժայռափոր այր, ուր մարդիկ դարեր շարունակ եկել են ուխտագնացության։
Մատուռի ներսում պահպանվել է X-XI դարերին (10-11-րդ դդ.) բնորոշ պատմական խաչքար, որը հանդիսանում է կառույցի հնագույն հոգևոր տարրը։
Հետագայում՝ XIX դարում (19-րդ դ.), տեղի գյուղացիները ժայռափոր սրբատեղի-մատուռի շուրջ կառուցել են քարաշեն փոքրիկ շինություն՝ դրա մեջ ընդգրկելով ինչպես ժայռափոր հատվածը, այնպես էլ արժեքավոր խաչքարը։
Շինության արտաքին ճակատը կառուցված է տեղական սրբատաշ քարերով, որի պատերին ագուցված են խաչային քանդակներ, իսկ կտուրին տեղադրված է մետաղական խաչ։
Ներսում՝ ժայռափոր խորշում, գտնվում է մոմավառության տեղն ու պատմական խաչքարը, որոնք մինչ օրս պահպանում են սրբատեղիի ուխտավայրի խորհուրդը։
Տեղակայում՝ ՀՀ, Շիրակի մարզ, գյուղ Բենիամին, գյուղից արևելք՝ բլրի գագաթին
Կոորդինատներ՝ 40.7093° N, 43.8798° E