Ճանաչենք Շիրակի մարզի հսկաներին - Ալյոշա Աբրահամյան

Ալյոշա Վարոսի Աբրահամյանը հայ անվանի ֆուտբոլային դարպասապահ է և ԽՍՀՄ սպորտի վարպետ: Ծնվել է 1945 թվականի օգոստոսի 28-ին Լենինականում (այժմ՝ Գյումրի, Հայկական ԽՍՀ, ԽՍՀՄ): Ունեցել է ԽՍՀՄ և Հայաստանի քաղաքացիություն:

​1966-1978 թվականներին հանդես է եկել Երևանի «Արարատ» թիմի կազմում՝ ԽՍՀՄ առաջնության բարձրագույն խմբում անցկացնելով 276 խաղ: «Արարատի» կազմում գրանցել է փառահեղ մարզական նվաճումներ․ 1973 թվականին դարձել է ԽՍՀՄ չեմպիոն, 1971 և 1976 (գարնանային) թվականների առաջնությունների արծաթե մեդալակիր, ինչպես նաև 1973 և 1975 թվականներին նվաճել է ԽՍՀՄ գավաթը: Մարզական ակտիվ կարիերան ավարտելուց հետո անցել է մարզչական լայն գործունեության:

​Հայկական ֆուտբոլի զարգացման գործում ներդրած նշանակալի ավանդի և ձեռք բերած փայլուն նվաճումների համար 2013 թվականի հոկտեմբերի 10-ին պարգևատրվել է «Հայրենիքին մատուցած ծառայությունների համար» 1-ին աստիճանի մեդալով:

​Ալյոշա Աբրահամյանը կյանքից հեռացել է 2018 թվականի օգոստոսի 26-ին Երևանում՝ 72 տարեկան հասակում: